MANILA, Philippines - Hiniling ni Quezon City District 5 Councilor Allan Butch Francisco sa awtoridad na magkaroon ng sunud-sunod na surprise inspection sa lahat ng pampubliko at pribadong palengke sa Lungsod Quezon upang matiyak na ang mga binebentang manok, itlog at iba pang poultry products ay safe para sa human consumption.
Sa nakaraang privilege speech sa konseho, idiniin ni Francisco ang kahalagahan kung bakit dapat na pag-usapan nang seryoso ang mahigpit na pag-iinspeksyon sa bawa’t pamilihan.
“Alam naman nating lahat na ang Quezon City ay isang major artery mula North Luzon patungo sa southern part. Karamihan sa mga produkto rito sa atin ay nagmumula sa northern provinces, especially from Pampanga,” aniya.
Nagpahayag ng pangangamba si Francisco sapagka’t nito lamang buwan nang hayagang malaman na ang mga manok, itlog at iba pang poultry products sa bayan ng San Luis, Pampanga ay kontaminado ng bird flu virus.
Dagdag ni Francisco, nais niyang masiguro sa committees on health and sanitation at market development and administration department ang mga contingency measures upang matiyak na walang infected poultry products sa ating mga pamilihan mula sa Pampanga.