Sa kabila ng mga batikos sa kapulisan
CAMP NAKAR, LUCENA CITY, Philippines - Sa kabila ng kinakaharap na kontrobersiya ng pambansang pulisya bunga ng anti-drug campaign, nananatiling mataas ang moral ng Quezon Police Provincial Office (QPPO), lalo pa at humakot sila ng mga parangal sa katatapos na 116th Police Service Anniversary na idinaos sa Camp Vicente Lim, Canlubang, Laguna, kamakalawa.
Mismong si PNP Chief Director General Ronald de la Rosa ang nag-abot ng plake ng parangal kay QPPO Director PS/Supt. Roderick Armamento bilang Best Provincial Strategy Management Unit (PSMO), Best Provincial Women and Children Protection Desk, Individual Award Category, Best Police Service Police Commisioned Officer (PCO) for Administration, SPO4 Allan Constantino (Tayabas City PNP).
Nakopo rin ng QPPO sa pamamagitan ng Tiaong Municipal Police Station sa pamumuno ni PC/Insp. Alvin Consolacion ang Best Junior Police Commisioned Officer for Operation, at Best Non Uniformed Personnel ni Flordeliza Cederia ng Candelaria MPS.
Ayon kay S/Supt. Armamento, ipagpapatuloy nila ang kampanya laban sa mga krimen, anti-drug operation at war against illegal gambling upang mapanatili ang maayos na peace and order sa lalawigan ng Quezon. (Tony Sandoval)