MANILA, Philippines - Natagpuan na nitong Sabado ng umaga ang nagsisimula nang maagnas na bangkay ng siyam na sibilyang iginapos at brutal na pinaslang ng Maute terrorists matapos harangin ang truck ng mga ito sa highway ng Marawi City sa kasagsagan ng bakbakan noong Martes.
Sa report na nakarating sa 1st Infantry Division ng Philippine Army, ang natagpuang mga pinaslang na sibilyan ay pawang nakagapos ang mga kamay at tadtad ng mga tama ng bala sa iba’t-ibang bahagi ng katawan.
Gayunman, hindi pa isinapubliko ang pagkakakilanlan sa mga biktima na driver at mga pahinante ng truck dahilan mainit pa ang bakbakan sa lugar.
Base sa inisyal na imbestigasyon, ang mga biktima ay lulan ng truck na naharang sa checkpoint ng mga armadong terorista na pinababa sa behikulo, iginapos ang mga kamay saka niratrat.