MANILA, Philippines - Dumating na kahapon ng madaling araw si Pangulong Rodrigo Duterte sa Moscow, Russia para sa kanyang 4 na araw na official visit mula Mayo 23-26.
Lumapag ang Philippine Air Lines (PAL) charter flight ni Pangulong Duterte kasama ang kanyang delegasyon sa Vnukovo International Airport sa Moscow bandang alas-4:00 ng madaling araw (oras sa Pilipinas) kahapon.
Inimbitahan ang Pangulo na bumisita sa Russia ni Russian President Vladimir Putin makaraang magkita ang mga ito sa 2016 APEC Summit sa Lima, Peru.
Magkakaroon ng magkahiwalay na pulong si Pangulong Duterte kina Pres. Putin at Prime Minister Dmitry Medvedev. Inaasahan ni Duterte na lalong magiging matatag ang relasyon ng Pilipinas at Russia sa kanyang pabisita sa Moscow.
Nakatakdang bumili rin ng mga armas at precision-guided bombs ang Pilipinas sa Russia upang magamit nito laban sa ISIS at mga local terrorist group.