MANILA, Philippines – Tiniyak ni Presidential spokesperson Ernest Abella na muling itatalaga ni Pangulong Rodrigo Duterte ang 15 miyembro ng kanyang Gabinete na na-bypassed sa makapangyarihang Commission on Appoinments (CA).
Paliwanag ni Abella, inabot ng recess ng Kongreso kaya hindi napagtibay ng CA ang appointments ng mga na-bypassed.
Nauna rito, nag-adjourned ang Kongreso para sa dalawang linggong Halloween break na nagsimula noong nakaraang Huwebes.
Kinakailangan ng Pangulo na muling italaga sa kanilang tungkulin ang mga na-bypassed na Cabinet men kung nais niyang manatili ang mga ito sa puwesto.
Kabilang sa mga na-bypassed sina Secretaries Vitaliano Aguirre ll ng Justice, Leonor Briones ng Education, Fortunato dela Peña ng Science and Technology, Ramon Lopez ng Trade and Industry, Regina Paz Lopez ng Natural Resources and Environment, Rafael Mariano ng Agrarian Reform, Ernesto Pernia ng Economic Planning, Emmanuel Piñol ng Agriculture, Rodolfo Salalima ng Information Communications Technology, Ismael Sueno ng local government, Judy Taguiwalo ng DSWD, Wanda Corazon Teo ng Tourism, Arthur Tugade ng Transportation, Paulyn Jean Obial ng Health at Perfecto Yasay Jr. ng Foreign Affairs.
Nakalusot sa CA bago mag-adjourned ang Kongreso sina Executive Secretary Salvador Medialdea, Benjamin Diokno ng Budget, Martin Andanar ng Communications, Carlos Dominguez III ng Finance, Silvestre Bello lll ng Labor, Alfonso Cusi ng Energy at Delfin Lorenzana ng Defense.