MANILA, Philippines – Mismong ang Malacanang na ang nanawagan kahapon sa mga mamamayan partikular sa Luzon na maghanda sa pagtama ng Bagyong Karen na inaasahang babagsak sa Aurora o Quezon ngayong umaga.
Sinabi ni Presidential Spokesperson Ernesto Abella na dapat maging handa ang lahat sa pagdating ng ika-11 bagyo sa bansa.
Sinabi pa ni Abella na inaasahang magiging maulan sa Metro Manila kaya dapat ring mag-ingat ang lahat at ilayo ang sarili sa peligro.
“Dito naman po sa may bandang ano po yata, Metro Manila ay magiging maulan over the weekend po, as far as I know. So I think I, you know, we would like to encourage mga kababayan natin na mag-ingat and then to please make sure na, ilayo po natin ang sarili natin sa peligro,” ani Abella.
Tiniyak ni Abella na nakahanda ang Department of Social Welfare and Development (DSWD) at iba pang ahensiya ng gobyerno sa pagbibigay ng tulong sa mga tatamaan ng bagyo.