MANILA, Philippines - Natapos na ang pamamayagpag ng may 100 junkshops sa kahabaan ng Onyx St. sa San Andres, Maynila matapos na suyurin ng mga tauhan ng Manila City hall ang lugar bunsod ng masikip na daloy ng trapiko dahil sa maraming obstructions.
Ayon kay Manila Mayor Joseph Estrada, mula Florentino Sts. hanggang Zobel Roxas St. sa kahabaan ng Onyx St. at maging ang Dagonoy Market ay nilinis ng Task Force Manila Clean-up upang mabigyan ng prayoridad ang mga motorista.
Ani Estrada, panahon na para linisin at paluwagin ang kalye mula sa mga nakahambalang na nagdudulot ng pagsisikip ng daan kung saan nagsasakripisyo ang mga motorista at mananakay.
Giniba rin ang mga barung-barong na nakatayo sa gitna o sa island na mas lalo pang nagpapasikip ng daan.
Pinabeberipika rin kung may mga business permit ang mga naturang junkshop at ma-regulate ng Bureau of Permits upang hindi na makapagpasikip ng daloy ng trapiko.