MANILA, Philippines – Sa halip na death penalty ang gamiting paraan para sa paglaban sa krimen, isinusulong ni Buhay Partylist Rep. Lito Atienza na mas paigtingin na lamang ang paggamit ng closed circuit television (CCTV) bilang spy camera sa lahat ng pampublikong lugar.
Ayon kay Atienza, dapat na i-intensify at maglagay ng cctvs sa mga mataong lugar na posibleng may makuhaan na nagaganap na krimen.
Ang mga spy ca-meras umano ay mas epektibo pa sa paghuli sa mga kriminal dahil maire-record ang krimen maging ang mukha o pagkakakilanlan ng suspek.
Giit pa ng mambabatas, praktikal na gamit ang CCTVs dahil kahit walang nagbabantay sa lugar ay makikita naman ang bawa’t galaw at mga kahina-hinalang tao sa paligid.
Ilang beses na rin umanong napatunayang malaking tulong sa mga awtoridad at mabilis na nareresolba ang krimen dahil sa mga spy cameras na nakalagay sa mga pampublikong lugar.
Sa tulong na rin umano ng social media ay mabilis na naipapakalat ang impormasyon dahil na rin sa mga kuhang video mula sa cctvs.