MANILA, Philippines – Napaslang ang dalawag sundalo ng Phil. Army habang dalawa naman ang nasugatan matapos na makasagupa ang mga rebeldeng New People’s Army (NPA) sa liblib na bahagi ng Brgy. San Isidro sa bayan ng Toboso, Negros Occidental kahapon ng umaga.
Gayunman, pansamantalang hindi muna tinukoy ang pangalan ng mga sundalo dahil kailangan pang impormahan ang kanilang pamilya.
Sa ulat ng Army’s 3rd Infantry Division, naganap ang bakbakan dakong alas-6:45 ng umaga makaraang rumesponde ang Army’s 62nd Infantry Battalion dahil sa presenya ng mga rebelde na nangha-harass at nangongotong sa mga sibilyan.
Agad namang pinagbabaril ng mga rebelde ang ilang sundalo na nagsipagtago sa kabahayan kung saan dalawang sundalo ang napatay.
Nagsitakas naman ang mga rebelde bitbit ang mga sugatang kasamahan.