MANILA, Philippines – Naniniwala ang isang political analyst na malaki ang ‘impact’ sa resulta ng eleksiyon ang naging pag-endorso ng maimpluwensiyang Iglesia ni Cristo (INC), na ang ibig sabihin ay malaking tsansa sa kanilang ‘minamanok’.
Sinabi ni UP Prof. Prospero de Vera, malaking karagdagan ang endorsement ng INC sa boto para sa mga kandidato ng local at national.
Sa naging pag-aaral umano, nasa 80 porsyento ang sinasabing conversion rate ng pag-endorso ng INC. Ito aniya ay nangangahulugan na 2 milyon voting members ng INC ang sumusunod sa iniendorso ng kanilang simbahan. Malinaw aniya na makukuha na ng kanilang inendorso ang karagdagang 1.6 milyon sa boto para sa national candidates.
Dapat rin aniya na irespeto ang naging desisyon ng pamunuan ng INC dahil pagpapakita ito ng kanilang tunay na pagkakaisa.
Sinabi pa ni de Vera na maituturing na game changer ang INC, lalo na sa labanan sa local level, kung saan maliit o kakaunting boto ang pinaglalabanan kumpara sa national level at maituturing na ‘literal’ na mahalaga ang bawat boto.