MANILA, Philippines – Higit pang palalakasin at paiigtingin ni Manila mayoralty candidate at 5th district Congressman Amado S. Bagatsing ang palakasan o sports sa lungsod ng Maynila sakaling palaring manalo bilang alkalde ng lungsod ngayong nalalapit na 2016 election.
Ito ang inihayag kamakalawa ni Bagatsing sa harap ng may halos 10,000 elementary at high school students, kasama ng kani-kanilang mga principals at guro mula sa mga pampubliko at parochial schools sa lungsod ng Maynila na dumalo sa unang araw ng taunang prestihiyosong palaro na inorganisa ng KABAKA Foundations, Inc., - ang KABAKA Sports Festival 2016 na ginawa sa Cuneta Astrodome sa Pasay City.
Ani Bagatsing, “Nakaka-inspire pagmasdan ang entusiyasmo ng ating mga kabataang Manilenyo na sadyang malapit sa aking puso. Ito ang ating mga ‘atleta ng bagong Maynila’. Sa pamamagitan ng larangan ng sports ay atin silang nailalayo sa mga negatibong gawain at bisyo, nabibiyayaan ng malusog at malakas na pangangatawan, matalas na pag-iisip at paninindigan bilang makabuluhang mamamayan sa hinaharap. Higit sa lahat ay katulad ng marami nang naging produkto ng ating KABAKA sports program, nabibigyan natin ang kabataang Manilenyo ng oportunidad sa pag-angat ng kanilang estado sa buhay sa pamamagitan ng sports. Kaya naman tuluy-tuloy at higit pa nating palalakasin at pag-iibayuhin ang ating mga sinimulang programa sa sports dito sa KABAKA kapag tayo ay nakaupo na bilang alkalde ng Maynila. Ngayong nga na hindi tayo Mayor ay may ganitong klase tayo ng programa para sa mga kabataan, what more kung tayo ay nasa Manila City Hall na,” nakangiting pahayag ni Bagatsing.
Sa datus ng ika-pitong edisyon ng KABAKA Sports Festival, may tig-40 teams mula sa mga larong basketball, volleyball, at chess ang maglalaban-laban kalahok ang mga atleta buhat sa elementary at high school ng mga pampubliko at parochial school sa lungsod.