MANILA, Philippines – Isang Pinay ang iniulat na nasawi matapos na mahagip ng rumaragasang behikulo sa Malaysia.
Kinilala ang Pinay na si Julie Baylon na namatay ilang minuto lamang makaraang mabangga habang papatawid sa isang kalsada sa Kuala Lumpur.
Sa inisyal na pagsisiyasat, nahagip si Baylon sa kanang bahagi ng puting kotseng Sedan na minamaneho ng isang Malaysian-Indian national.
Ang nasabing OFW ay nagtamo ng matitinding sugat dahil sa lakas ng pagkakabangga nito na naging sanhi ng pagkawasak din sa kanang headlight ng nasabing sasakyan.
Nagawa pang humingi ng tulong ng biktima subalit namatay din kinalaunan matapos ang insidente.
Kusang sumuko ang driver na hindi pinangalanan na nanatili sa pinangyarihan ng insidente matapos na dumating ang mga awtoridad.
Nangangalap na umano ng pondo ang mga kasamahan ng nasabing OFW upang maiuwi ang mga labi ng biktima sa kanyang pamilya.