MANILA, Philippines – Tiniyak ng pamunuan ng Department o Social Welfare and Development (DSWD) na mananagot ang mga opisyal na responsable sa pagkasira ng mga relief goods na nakalaan sana para sa mga biktima ng super typhoon Yolanda.
Ayon kay DSWD Social Marketing Service director Cezario Joel Espejo na mahaharap sa administrative at criminal charges ang mga opisyal na sangkot dito.
Sinabi ni Espejo na mayroon ng initial findings ang probe team na inutos ni DSWD Secretary Dinky Soliman para imbestigahan ang insidente.
Pahayag ni Espejo na tukoy na kung sino ang may sala kaugnay sa nasabing insidente subalit hindi pa muna pwedeng ilabas sa media.
Sa ngayon kasi, pina-finalize na ang report at sasampahan ng kaukulang kaso ang mga opisyal na sangkot dito.
Mismong si Soliman ang nagkumpirma sa findings ng COA na nasa kabuuang P2.784 million halaga ng family food packs na laan sa mga biktima ni Yolanda ang nasayang lamang at naitapon dahil sa kapabayaan ng ilan.