NORTH COTABATO, Philippines – Aabot sa P1.5 milyong halaga ng shabu ang nasamsam sa notoryus na tulak ng droga sa loob ng bus sa public terminal ng Tacurong City, Sultan Kudarat kahapon ng umaga.
Ayon kay Philippine Drug Enforcement Agency Regional Office 12 Lyndon Aspacio, kinilala ang suspek na si Purita Jalos, 47, ng General Santos City.
Narekober sa suspek ang 200 gramo ng shabu na tinatayang aabot sa P1.5 milyon.
Ayon kay Aspacio, mula sa area ng Autonomous Region in Muslim Mindanao (ARMM) ang suspek na dating may kaso kaugnay sa illegal na droga at hindi na aniya ito makapagpiyansa pa dahil sa milyong halaga ng droga na nasamsam.
Nahaharap si Jalos sa kasong paglabag sa Section 5 ng Republic Act 9165 (Comprehensive Dangerous Drugs Act of 2002).
Nakakulong na ang suspek sa holding cell ng PDEA-12 at nakatakdang kasuhan ngayong araw.