MANILA, Philippines – Malayang makakalahok ang mga aktibong miyembro at opisyal ng Philippine National Police (PNP) sa ikinakasang ‘March for Justice for Special Action Force 44’ na isasagawa sa darating na Marso 8.
Ayon kay PNP Spokesman Chief Supt. Generoso Cerbo Jr., walang nakikitang problema ang pamunuan ng PNP kung mayroon mang mga aktibong pulis sa gagawing ‘sympathy walk’ para sa minimithing hustisya sa SAF 44.
Pangungunahan ang ‘indignation rally’ ng mga biyuda, kamag-anak at mga kaibigan ng SAF 44, gayundin ng iba’t-ibang grupo at personalidad na nakikisimpatiya sa pagmasaker sa mga ito ng Moro Islamic Liberation Front (MILF) at BIFF matapos na makorner sa bakbakan kaugnay ng inilunsad na Oplan Exodus.
Nilinaw naman ni Cerbo na maaaring lumahok ultimong mga aktibong pulis sa ‘sympathy walk’ pero dapat ay awtorisado ito ng kanilang mga superiors at may permit din ang kanilang isasagawang pagmamartsa para sa hustisya.
Samantalang, kailangan ding hindi naka-duty ang mga ito sa mismong araw ng gagawin ang aktibidad upang hindi makaapekto sa kanilang trabaho ang kanilang gagawing pagkilos.
Ayon kay Cerbo , hangga’t wala namang ginagawang masama ang mga pulis ay walang dahilan para hadlangan ang mga ito na lumahok sa ‘ march for justice’ para sa mga nasawing SAF 44 commandos.
Ikinatwiran ni Cerbo na malaya rin namang maghayag ng kanilang saloobin ang mga pulis sa anumang uri ng isyu basta’t nasa tama ito at mapayapang pamamaraan.
Nabatid na sa Marso 8 ay inaasahang dadagsain ng mga tao ang mga lansangan mula sa Cavite City, EDSA patungong Quezon City circle para sa martsa sa hustisya sa SAF 44 commandos.