MANILA, Philippines – Inilbas ngayong Martes ni Sen. Grace Poe sa pagdinig ng Senado sa Mamasapano clash ang umano'y mga larawan ng recruitment at training ng Moro Islamic Liberation Front (MILF) sa Sulu.
Nagmula ang larawan sa mga residente ng lalawigan na ipinagkatiwala nila sa mga opisyal ng lokal na pamahalaan.
Nangyari ang umano'y training at recruitment nitong Enero 1, 2015 sa Barangay Punay sa Panglima Estino, Sulu.
Bukod sa mga larawan, may nakalakip ding liham na nagsasabing nagsagawa ang MILF ng basic training para sa Bangsamoro National Guard. Ang naturang training ang kinakailangan bago maging ganap na miyembro ng MILF.
"These recent developments have raised fears among ordinary citizens in the Province, instead of hope, after the signing of the Comprehensive Agreement on the Bangsamoro," nakasaad sa liham.
Ayon pa sa liham ay nagre-recruit din ang MILF sa Zamboanga del Sur.
Samantala, hindi naman makumpirma ni MILF chief peace negotiator Mohagher Iqbal ang mga larawan.
"I've asked people on the ground to validate. This is something we will need to respond to," wika naman ni Presidential Adviser on the Peace Process Teresita Deles.