Long shot ni Bossing

Sa tulong ng Qatar, nakamit ng Gilas Pilipinas ang mithiin na makakuha ng magaan-gaan na laban sa quarterfinal round ng 27th FIBA Asia Championship.

Sa halip na defending champion China, Kazakhstan ang haharapin ng Team Phl sa Final Eight sa pagsisimula ng do-or-die games ngayong gabi.

Sa apat na koponan mula Group F na umusad sa quarters, talaga naman Kazakhstan ang pinakamahina kumpara sa Iran, South Korea at China.

Ngunit para sa mga ilang eksperto, wala pa ring kasiguruhan ang panalo ng Gilas sa mga Kazakhs.

“Nothing is easy, nothing is sure,” ika ni Gilas head coach Chot Reyes.

Nagkakaisa sila coaches Jong Uichico, Ryan Gregorio, Derrick Pumaren at Dindo Pumaren, tepok ang Pinas kung kapareho ng inilaro nila sa Hong Kong ang ilalaro kontra Kazakhstan.

“Kailangan pag sinabing mas malakas ka, ipakita mo sa court na talagang mas malakas ka,” ani Derrick Pumaren. “Di pwedeng kapag mahina ang kalaban, lelembot-lembot ka. Kailangan kill.”

“Di tayo familiar sa Kazakhstan dahil madalang silang lumaro sa international competitions. Alam natin malaki sila at pisikal. Di natin kailangan sumabay ng pisikalan dahil di natin laro yon. But we have to be tough,” ika ni Uichico.

“Crucial si Ranidel de Ocampo. Kailangan pumutok siya against Kazakhstan,” suhestiyon ni Dindo Pumaren.

“They’re definitely taller and heftier than us. It’s not gonna be easy,” ani Gregorio.

***

Dahil walang gaanong enerhiya ang laro ng Gilas kontra Hong Kong, wala ring enerhiya ang crowd noong Miyerkules ng gabi. Ngunit biglang nabuhay sa entra ni TV/movie star Vic Sotto (biyenan ni Marc Pingris).

Sa isang yugto ng laro sa final half, dinakma ng Eat Bulaga bossing ang bola ng ito ay tumapon sa kanilang lugar sa Patron Box section. Pagdakma ay derecho kasa ng isang long shot na awtomatikong ng hudyat ng hiyawan sa arena.

“Bossing! Bossing! Bossing,” hiyaw ng mga nagising na manood. Ang enerhiya ay mukhang nakatulong sa crucial closing run na binunot ng Gilas Pilipinas.