MANILA, Philippines – Ipinagpaliban ng Sandiganbayan ang pagdinig ngayong Miyerkules sa kasong pandarambong ng dating Pangulong Gloria Macapagal-Arroyo kaugnay sa maanomalyang $329-milyon broadband netwrork deal sa pagitan ng gobyerno at ZTE Corp. ng Tsina noong 2007.
Hindi itinuloy ng Fourth Division ng anti-graft court ang pagdinig matapos humingi ang mga abogado ni Arroyo ng mas mahabang panahon upang makapaghanda ng sagot sa desisyon ng korte na ibasura ang nauna nilang mosyon.
Hiniling ng kampo ni Arroyo sa korte na ibasura ang kasong pandarambong.
Iniskedyul ng korte ang pagdinig sa Marso 20 at 21, ganap na 8:30 ng umaga.
Didinggin sana ng korte ang testimonya ng apat na testigo, kabilang ang dating House Speaker na si Jose de Venecia, sa naturang kasong pandarambong.
Bukod sa dating pangulo, sinampahan din ng kasong pandarambong sina dating first gentleman Jose Miguel Arroyo, Commission on Election chairman Benjamin Abalos at dating kalihim ng Department of Transportation and Communication na si Leandro Mendoza.
Ang naturang kontrata ay pinirmahan sa Tsina noong Abril 21, 2007.