MANILA, Philippines - Dalawang Filipino na bihag ng mga militanteng Muslim sa Algeria ang namatay sa isang rescue operation ng special forces sa naturang bansa nitong Biyernes.
Bukod sa dalawang Filipino, apat pang mga bihag ang namatay din matapos bombahin ng Algerian helicopters at sugurin ng Algerian special forces ang gas plant kung saan itinago ng mga militante ang kanilang mga bihag.
Inaalam pa ng mga awtoridad ang pagkakakilanlan ng mga namatay na bihag.
Ayon sa mga ulat, marami pang mga bihag ang hindi pa nakikita ng mga awtoridad sa Algeria matapos ang rescue operation. Kabilang sa mga bihag ay mga Amerikano, Briton, French, Norwegians, Romanians, Malaysians, Japanese at Algerians.
Sa mga ulat nitong Huwebes, lagpas 40 umano ang mga dayuhang bihag ng mga militante.