Inamag na Tuwalya
May mga panahon tayong nakalilimot sa mga basang damit o tuwalya na naiwan sa bag. Ang resulta tuloy nito ay ang pagkakaroon ng amag bukod pa sa mabahong kulob na amoy. Pero huwag mag-alala dahil may solusyon ang inyong kuya riyan.
Ilabas sa likod-bahay ang tuwalya at pagpagin ang amag. Paarawan ito nang tatlong oras para mamatay ang bacteria at mawala ang amoy. Saglit na ibabad ito sa pinaghalong bleach at tubig bago ilagay sa washing machine. Maaari rin itong labhan gamit ang kamay. Ibilad uli sa arawan hanggang matuyo.
Gawin ito para hindi mahalo ang amag sa ibang labahin. Ang amag kasi ay nakapagdudulot din ng sakit lalo na sa mga bata. May mga uri rin ng amag na nakati-trigger ng allergy na nakamamatay.
Ito po ang inyong Kumpunerong Kuya na nagsasabing, kung gusto maraming paraan!
- Latest