Palakasin ang iyong immune system

Dahil sa nagdaang Kapaskuhan, tiyak na hindi mo naiwasan ang kumain ng mga pagkaing maaaring magdala sa’yo ng sakit dahil sa sobrang fats na taglay nito. Ang pagkain ang pinagkukunan ng enerhiya ng katawan ng tao. Lahat ng pagkain ay nakakatulong para magkaroon ng matibay na resistensiya. Ngunit may mga partikular na pagkain na maaaring tumulong sa’yo upang ikaw ay gumanda at maging malakas ang iyong immune system. Narito ang ilan:

Avocado – Tinatawag din itong “miracle food” dahil sa mataas na taglay na vitamin B at E na siyang tumutulong para magkaroon ng malusog na scalp o anit na nagreresulta upang tubuan ng magandang hibla ng buhok. Kaya kung nais magkaroon ng “shiny hair” na hindi naman kailangan na palaging magpa-hair spa, kumain lang nito.

Kiwi – Ito ay mahusay sa iyong buto at balat. Ayon kay Lisa Drayer, may akda ng “The Beauty Diet”, ang isang tasa ng kiwi  ay nagtataglay ng mas madaming vitamin C kumpara sa orange. Naibabalanse rin nito ang mga masasamang element sa iyong katawan na siyang nagiging sanhi ng cancer at sakit sa puso.

Garbanzo Beans – Kung ayaw mo agad pumuti ang iyong buhok, kumain ka nito. Ang buhok kasi ay binubuo ng protein at keratin kaya mahalagang hindi ka nagkukulang ng mga bitaminang ito, dahil kung hindi ay mabilis kang makakalbo o palaging mapuputol ang iyong buhok.

Oyster o talaba – Mayaman ito sa zinc at selenium kaya naman mahusay itong panlaban sa mga sakit na umaatake sa mata gaya ng katarata.