MAYA-MAYA nagseryoso sa pagsasalita si Sir Rene.
“Mayroon lang akong pinangangambahan sa balak ninyong paghahanap kay Rose. Ito naman ay pansarili kong opinyon.’’
“Ano po yun Sir Rene?’’ tanong ni Eliz.
“Halimbawa na makita nga ninyo si Rose at sabihin ang tungkol sa akin, hindi kaya siya tumanggi. Isa pa, paano kung may pamilya na siya, papayagan ba siya ng kanyang pamilya na makipagkita sa akin? Dati niya akong nobyo at baka dahil sa pagsulpot ko e maapektuhan ang pagsasama nila. ‘Yan ang iniisip ko, Eliz, Atty. Gino.’’
Nagkatinginan sina Eliz at Gino. Kunwari ay problema ang sinabi ni Sir Rene. Ginalingan pa ng dalawa ang pag-arte.
“Siguro naman po ay wala pang pamilya si Rose,’’ sabi ni Eliz.
“Kapag nalaman po namin ni Eliz na may pamilya na siya e hindi na namin siya gagambalain. Irerespeto namin ang privacy niya,’’ sabi naman ni Atty. Gino.
“Oo nga po Sir Rene, once po na nalaman na may family siya, hindi na kami magpapatuloy sa misyon.’’
Nagliwanag ang mukha ni Sir Rene. Nang magsalita ay may galak na.
“Sige, ganyan na lang ang usapan natin. Mabuti at naisip n’yo yan.’’
Nang sumapit ang lunch time, hindi na sila pinaalis ni Rene at doon na pinakain.
Nag-order ito sa Grab nang maraming pagkain.
Habang kumakain, si Rose pa rin ang topic nila.
“Nag-aalinlangan kasi ako na baka may pamilya na siya kaya ko nasabi sa inyo ang problema. Kaya naisip ko na huwag nang ituloy ang plano.’’
“Hindi po tayo titigil Sir Rene. Malakas ang kutob namin ni Gino na single pa si Rose,’’ sabi ni Eliz.
Natuwa si Rene.
“Kumain na tayo. Daming pagkain! Para sa atin lahat yan!’’
(Itutuloy)