APAT na taon nang iniinda ng lalaking tinawag na Zhao ang pananakit ng kanyang dibdib at iba pang bahagi ng katawan. Gumastos na siya ng 190,000 Yuan sa paghahanap ng lunas sa subalit walang makatukoy sa kanyang sakit.
Iba’t iba ang diagnosis sa kanya tulad ng sepsis at leukemia ngunit ang totoo palang sanhi ng kanyang mga nararamdaman ay isang toothpick na nasa right atrium ng kanyang puso!
Sumailalim si Zhou sa open heart surgery sa isang ospital sa Nanning, Guangxi Province Zhao at nakuha ang 6 centimeter na toothpick sa right atrium ng kanyang puso. Naging matagumpay ang operasyon.
Walang malinaw na paliwanag kung paano napunta ang toothpick ngunit may teorya si Zhao na nalunok niya ito habang nakikipag-inuman. Ipinaliwanag ni Zhao na gawain na niya na maglagay ng toothpick sa kanyang baso tuwing nakikipag-inuman bilang palatandaan upang hindi magkamali na makainom sa baso ng iba.
Dahil sa gawaing ito, ilang beses na siyang nakalunok ng toothpick pero nakukuha naman daw niya ito. Sa tingin niya, sa sobrang kalasingan, hindi na niya namalayan na nalunok nang tuluyan ang toothpick.
Nakarekober si Zhao sa operasyon at bumalik na sa dati ang kanyang kalusugan.