UPANG maengganyo ang mga taga-West Virginia na magpabakuna laban sa COVID-19 ay inanunsyo ng gobernador doon na magkakaroon ng papremyo para sa mga nabakunahan na.
Inanunsyo ni West Virginia Governor Jim Justice na nasa dalawang truck, limang hunting rifles, at limang hunting shotguns ang maaring mapanalunan ng mga nasa listahan ng mga nabakunahan na ng COVID-19 vaccine.
Bukod sa mga baril at truck, maari ring manalo ng $1.5 million ang mga nakapagpabakuna na.
Mamimigay rin ng scholarship plan at libreng weekend getaway para sa mga suwerteng mabubunot.
Isa lamang ang West Virginia sa mga states sa Estados Unidos na nagsasagawa ng programa para mahikayat ang kanilang mga mamayan na magpabakuna laban sa COVID-19.
Nakatakdang magpa-raffle ang West Virginia sa mga nabakunahan mula Hunyo 20 hanggang Agosto 4, 2021.