ISANG lalaki sa Illinois ang nag-alaga ng buwaya sa kanyang bahay para raw maka-attract ng babae.
Nakatanggap ng tawag sa telepono ang Cook County Sheriff’s Office at sinabing isang lalaki ang nag-aalaga ng buwaya sa bahay nito.
Agad na pinuntahan ng mga pulis ang bahay at ganoon na lamang ang kanilang pagkagulat nang makita ang buwaya na inaalagaan ng lalaki na tumangging ibigay ang pangalan.
Natagpuan ng mga pulis ang buwaya na nakalagay sa isang fish tank sa kitchen. Sa ibabaw ng fish tank ay may heatlamp. Nakita ng mga pulis na lumalanguy-langoy ang four-foot na buwaya.
Sinabi ng lalaki na binili niya ang buwaya sa Indiana, Illinois sa halagang $200. Para raw hindi lumaki ang buwaya ay inilagay niya sa fish tank at pinakakain lamang niya ng isang beses sa loob ng isang buwan. Sampung buhay na daga ang ipinakakain niya sa buwaya.
Nang tanungin ng mga pulis kung bakit buwaya ang naisipang alagaan ng lalaki, sinabi nito na mabisang pang-attract ng mga babae ang buwaya.
Nagkatinginan na lamang at napailing-iling ang mga pulis sa sagot ng lalaki.
Kinumpiska nila ang buwaya at ipinagkaloob sa Chicago animal welfare group.
Hindi naman binanggit kung kinasuhan ang lalaki sa pag-aalaga ng buwaya.