NAGING instant hero ang bus driver na si Stephen Bernard, 52, ng New York makaraang mailigtas niya sa kamatayan ang isang 7-taong gulang na batang babae na nahulog mula sa third floor ng isang apartment building.
Naglalakad pauwi si Stephen mula sa kanyang pinagtatrabahuhang bus company nang bigla niyang maispatan sa third floor ng Brooklyn building ang isang batang babae naglalaro at nagsasayaw sa ibabaw ng air conditioning unit.
Hanggang sa makita na lamang niya na nahuhulog na ang bata.
Walang sinayang na panahon si Stephen at mabilis na tumakbo para saluhin ang bata. Habang tumatakbo, ang sinasambit niya ay “Diyos ko, hayaan mo pong masalo ko ang bata. Please, please…”
Dininig ang dalangin ni Stephen at nasalo niya ang bata. Eksakto sa mga braso niya.
Ganunman, nabalian ng tendon si Stephen dahil sa pagsalo. Subalit ayon kay Stephen, balewala iyon sa kanya. Ang mahalaga nailigtas niya ang bata sa tiyak na kamatayan.