IPINAMALAS ng isang arctic fox ang tibay nito sa paglalakbay matapos itong maglakad ng 3,500 kilometro sa nagyeyelong paligid at marating ang Canada matapos lamang ng 76 araw simula nang umalis ng Norway.
Nilagyan ng satellite tracker ang arctic fox, nagsimulang maglakad mula sa isla ng Spitsbergen noong Marso. Sa loob lang ng 21 araw, narating na nito ang Greenland. Mula roon, narating na ng arctic fox ang Ellesmere Island ng Canada.
Sa ngayon, wala nang nakaalam sa kinaroroonan ng arctic fox dahil hindi gumagana ang tracker na sumusubaybay sa bawat pagkilos nito.
Ayon naman sa mga researcher, hindi lamang daw patunay ang paglalakbay sa tibay ng arctic fox kundi pati na rin sa kahalagahan ng mga nagyeyelong bahagi ng karagatan sa migration na ginagawa ng mga hayop.
Kung magpapatuloy kasi ang problema ng mundo sa global warming ay marami sa mga nagyeyelong bahagi ng karagatan ang matutunaw kaya mawawalan ang mga hayop ng katulad ng arctic fox ng tulay para sa kanilang mga taunang paglalakbay.