Bukas na ang huling araw ng kampanya, siguradong ratsada na ang mga kandidato sa mga huling oras nang panunuyo sa mga botante.
Malamang magmistulang piyesta sa araw na ito, dahil pagkatapos nito ay pahinga na muna ang mga kandidato.
Ngayon at hanggang bukas, sigurado marami ang magsasagawa ng meeting de avance. Huling paramdam, ika nga!
Dito di malayong magkasalubungan ang magkabilang panig, gaya nang nauna na nating paalala sana eh matapos ang panahon ng kampanya na payapa.
Wala nang masasaktan dahil sa mga iringan.
Sa Lunes naman, magkakaalaman na kung sino ang pinaniwalaan ng taumbayan sa kanilang mga ipinangako sa kampanya.
Baka ilang oras lamang matapos ang halalan malalaman na kung sino ang mga bagong manunungkulan.
Hangad natin na mairaos ang botohan nang mapayapa hanggang sa matapos ang bilangan.
Bagamat inaasahan na ang mga dating problema na kinakaharap ng mga botante tuwing halalan, sana ay malunasan ito sa maayos na paraan.
Aantabay tayo sa mga kaganapan sa mga huling araw ng kampanya, hanggang sa oras ng halalan.