AYON sa isang pag-aaral na isinagawa noong 2003, nasa 20 hanggang 30 identical triplets lamang ang ipinapanganak sa bawat isang milyong panganganak.
Kaya naman masasabing napakapambihira nang magluwal si Nicole Choge ng tatlong supling na hindi lamang magkakakambal kundi pawang magkakamukha rin.
Ilang minuto lamang ang pagitan ng pagsilang ng triplets na sina Ron, Elkanah at Abishai, na pawang mga anim na buwan na premature.
Ayon sa mga doktor, madalas talagang ipanganak na premature ang mga kambal. Ang kakaiba raw o ang “one in a million” na pangyayari ay ang maging identical o magkakamukha ang triplets.
May isa nang 2 taong gulang na anak ang mag-asawang Choge at nagdasal daw sila para sa isa pa ngunit ayon sa ama ng mga kambal na si Caleb ay sadyang tatlong beses kung sumagot ang Maykapal sa mga kahilingan kaya naman biniyayaan sila nito ng triplets.
Ang una raw tuloy na planong pag-ipunan ni Caleb matapos ang panganganak ni Nicole ay ang pagbili ng mas malaking sasakyan para magkasya silang buong pamilya.