Matandang Tinali (25)
NAGTATAKANG napatingin si Manong Naldo kay Dong nang sabihin nito ang iuukit na pangalan ng farm.
“Kakaiba ba ang pangalan, Manong Naldo?’’ tanong ni Dong.
“Oo. Ngayon lang ako nakarinig ng ganyan. Dito kasi ang pangalan ng farm ay galing sa apelyido gaya ng Buenviajes’ Farm, Orijola Farm at iba pa. Bakit Matandang Tinali Farm ang napili mo, Dong? Sa akin e nagtatanong lang naman.’’
“Kasi po noong nasa Saudi pa ako ang tawag sa akin doon ay si Matandang Tinali.’’
‘‘Di ba ang ibig sabihin ng matandang tinali ay matandang binata ?’’
‘‘Opo.’’
‘‘Matandang binata ka, Dong ?’’
‘‘Opo, past 50 na po ako. Medyo makunat na ang balat.’’
“Aba e hindi halata, ‘kala ko mga lampas kuwarenta anyos ka lang.’’
“Marami pong salamat, Manong. Mayroon pa palang nadadaya ang edad ko.’’
“Totoo naman ang sinasabi ko. Mukha ka pang binata.’’
“Wala pa po akong asawa, Manong Naldo.’’
“Bakit?’’
“Wala pa pong masuwertehan.’’
“Pero nanligaw ka na noon?’’
“Ligaw-tingin lang po. Wala po akong masabi sa babae.’’
“Ah tiyope ka, Dong.’’
“Ganun na nga po.’’
“Sayang naman ang lahi mo kung hindi ka makakapag-asawa.’’
“Oo nga po, Manong Naldo pero ano ang magagawa ko? Wala talagang magustuhan.”
“Hayaan mo at kapag may naisapatan ako rito na puwedeng ligawan e sasabihin ko sa’yo.’’
“Salamat po, Manong.’’
“Sige aalis na ako. Kapag natapos na ang iuukit kong pangalan ng farm e ipakikita ko sa’yo. Siguro mga dalawang linggo e tapos ko na yun.’’
‘‘Tamang-tama po siguro na pagbalik ko rito galing Maynila e tapos na ano. Ikabit mo na sa haligi para mas magandang tingnan.’’
‘‘Sige Dong.’’
LUMUWAS ng Maynila si Dong at makalipas ang isang buwan, muli siyang bumalik sa farm.
Tuwang-tuwa si Dong nang makita ang nakaukit na pangalan ng farm. MATANDANG TINALI FARM.
‘‘Ang ganda, Manong Naldo!’’
‘‘Aalagaan ko yan ng varnish para hindi mabulok.’’
“Sige po Manong. Sabihin mo sa akin kung magkano ang ginawa mong pa-ngalan at babayaran kita.’’
(Itutuloy)
- Latest