GUMULONG na ang Senate investigation sa kontrobersiyal na Dengvaxia vaccine. Sa ikalawang hearing, dumalo ang mga inimbitahan kabilang si dating President Noynoy Aquino. Dinepensa niya ang desisyon na i-implement ang P3.5 bilyong vaccination program noong 2016. Layunin nila na makapagsalba ng buhay.
Sa unang pagdinig noong Lunes, nagkanya-kanyang turuan ang mga dating Health officials kaugnay sa Dengvaxia. Lahat ay nagsasabing wala silang kasalanan sa pagbibigay ng bakuna. Wala rin daw nangyaring corruption sa pagbili ng Dengvaxia. Kumunsulta umano sila sa mga eksperto bago ginawa ang vaccination program.
Nagsimula ang kontrobersiya nang ihayag ng Sanofi na palulubhain nito ang dengue kapag naiturok sa hindi pa nagkakasakit nito. Kailangang ibakuna ito sa mga nagka-dengue na. Itinigil na ng Department of Health (DOH) ang immunization program. Mahigit 800,000 katao karamihan ay mga batang mag-aaral sa National Capital Region (NCR), Calabarzon at Central Luzon ang nabakunahan noong Abril 2016.
Maraming health experts ang nagsabi na minadali ang pagbibigay ng bakuna. Hindi naman daw napakaseryoso ng dengue sa bansa kaya lubhang nakapagtataka kung bakit ura-urada itong ibinigay sa mga bata. Maari pa naman daw hintayin na mapag-aralang mabuti ang Dengvaxia kung totoong epektibo laban sa dengue.
Humarap din sa pagdinig ang dalawang Sanofi officials at pinanindigan nila na ligtas at mapagkakatiwalaan ang Dengvaxia. Ito ay sa kabila na inamin na mismo ng kompanya na palulubhain ang dengue kapag ibinakuna sa hindi pa nagkakaroon ng sakit.
Marami pang hahalukayin ang Senado sa isyung ito at maaaring mayroon pang pagtuturuan at pagsisisihan. At habang may nagsisisihan, maraming magulang ng mga batang nabakunahan ang nangangamba sa maaring sapitin ng kanilang mga anak.
Ang nararapat gawin ng DOH ay hanapin ang mga batang nabakunahan at magsagawa na ng pagmonitor sa kalagayan ng mga ito. Kailangan nila ng ayuda. Makipag-ugnayan sila sa mga magulang. Kaysa ubusin ang panahon sa pagtuturuan, ang mga kawawang bata ang pagbuhusan ng pansin ngayon. Sila ang dapat unahin at saka na ang mga dapat parusahan sa minadaling Dengvaxia. Mas mahalaga ang buhay ng mga bata ngayon.