Ang araw ng pagsilang mo nang sandaling matalastas
Inisip na agad naming ang handog na nararapat;
Hangad naming alayan ka ng gunitang walang kupas
Ng gabundok na salapi’t kumpol-kumpol na bulaklak
Dapwa’t kami’y sadya yatang tinitikis n’yaring palad
Bulaklak na napipita ni anag-ag di mabakas;
Kaya kami’y nagpasyang hawakan na ang panulat
At ang luha’y padaluyin upang dito ay itatak
Sa pagdaloy luha nami’y waring tulo ng kandila
Na nag-isa at nabuong taludtod ng isang tula;
Na nagtanod at nagbantay sa mithing dakila
Na lumawig ang buhay mo – ang buhay mong mapagpala!