Manibela, magsasagawa ngayon ng tigil-pasada
MANILA, Philippines — Ngayong araw ay muling nagkasa ng transport strike ang grupong Manibela kasunod ng pagtatapos ng 3-araw na nationwide transport strike na idinaos ng grupong Pinagkaisang Samahan ng mga Tsuper at Opereytors Nationwide (PISTON) at iba pang labor groups mula Abril 29 hanggang Mayo 1.
Ayon kay Mar Valbuena, lider ng Manibela, hindi pa rin sila nawawalan ng pag-asa na pakikinggan ni Pang. Ferdinand Marcos Jr. ang kanilang panawagan na itigil ang pagpapatupad ng Public Utility Vehicle Modernization Program (PUVMP).
Matatandaang pormal nang nagtapos ang franchise consolidation deadline na unang bahagi ng PUVMP noong Abril 30.
Una na ring nagbabala ang Land Transportation Franchising and Regulatory Board (LTFRB) ang mga jeepneys na bigong tumalima sa konsolidasyon ng prangkisa na ikokonsidera na silang kolorum sa pagtatapos ng naturang deadline.
Nakatakdang simulan na umanong hulihin ng LTFRB ang mga kolorum na sasakyan sa ikalawang linggo ng Mayo at papatawan ng kaukulang penalties.
- Latest
