MANILA, Philippines — Namatay noon din ang isang mister habang sugatan naman ang kanyang misis nang tambangan at pagbabarilin ng dalawang lalaking lulan ng motorsiklo sa Antipolo City sa Rizal, nabatid kahapon.
Dead-on-the spot si Abad Antonius Lazaro habang nagtamo naman ng sugat sa hita ang kanyang asawang si Grace, at nilalapatan na ng lunas sa pagamutan.
Nakatakas naman ang mga salarin na inaalam pa ang pagkakakilanlan.
Batay sa ulat ng Antipolo City Police, nabatid na, alas-6:00 ng gabi nang maganap ang krimen sa VV Soliven St., Brgy. Mayamot, Antipolo City.
Lulan ang mag-asawa ng kanilang Honda Jazz sedan, na may plakang ZCH-398, at patungo sa direksiyon ng Sumulong Highway nang mapahinto sila sa isang intersection sa lugar.
Dito na umano sila biglang nilapitan ng mga suspek at pinaulanan ng bala.
Nang makitang napuruhan ang target ay mabilis na tumakas ang mga salarin.
Iniimbestigahan na ng mga otoridad ang krimen upang matukoy ang pagkakakilanlan ng mga salarin at matukoy ang motibo nila sa likod nito.