MANILA, Philippines — Tatlong katao na sakay ng motorsiklo ang nasawi kabilang ang isang aktibong miyembro ng Philippine Marine matapos na araruhin sila ng isang pampasaherong jeep na nag-overtake, naganap kamakalawa sa highway na sakop ng Brgy. Sapang 1, Ternate, Cavite.
Namatay agad ang mga biktima na kinilalang sina alyas Jun, 38, miyembro ng Phil. Marine at nakadestino sa Force Reconnaissance, Maritime Base Gregorio Lim na minamaneho ang Suzuki Smash, kulay itim at may temporary plate number na 01-0482541; alyas Gabriel, 54, golf crew, residente ng Brgy. Pinagsanjan B, Maragondon, Cavite at ang angkas na si alyas Teng, 40, residente ng Brgy. Sapang 1 ng nasabing bayan.
Nasugatan naman ang 15 katao na sakay ng pampasaherong jeep kabilang ang driver na si alyas Justin, 57, na dinala sa mga ospital.
Sa ulat, ng pulisya, bago naganap ang sakuna, alas-6:45 ng gabi ay galing sa beach outing ang pampasaherong jeep (DXY-982) pauwi na sa Maynila.
Mabilis umanong nag-overtake ito sa kotse na nasa unahan at nawalan ng kontrol dahilan para bumaliktad at nasapol ang paparating na dalawang motorsiklo na kinalululanan ng mga nasawi.