MANILA, Philippines — Sa pagdinig ng Senate Committee on Games and Amusement na may isang indibiduwal na nanalo sa lotto ng mahigit sa P600 milyon matapos tumaya sa tatlong lotto outlets at mamuhunan ng nasa P90 milyong taya.
Ito ang ibinunyag ni Senator Raffy Tulfo at sa Binondo nangyari ang pagtaya sa lotto kung saan gumamit ng tinatawag na System 12 ang nasabing indibidwal.
“Nag-invest siya ng 90 million at nanalo siya ng P600 million at ang tinaya niya ay System 12. So again, one person may-ari siya. Maybe siya ang may-ari, maybe hindi. Parang nag-invest siya ng P90 million, tig-P30 million each outlet na siya ang may-ari... This is in Binondo area,” ani Tulfo.
Sinabi ni Tulfo na hindi malinaw kung agent o talagang sugarol lamang ang nasabing indibiduwal.
Sa tatlong magkakahiwalay na outlet aniya tumaya ng System 12 sa lotto ang nasabing indibidwal.
“Sa system 12 kasi hindi uulit yun eh. Hindi uulit so although wala akong nakikitang ilegal doon…ang isang tao tatayaan niya lahat ng number possible combination para bumalik yung taya niya plus may tubo pa siya,” ani Tulfo.
Pero ang nakikita lamang aniyang problema ni Tulfo ay ang pagtaas ng premyo na nadagdagan ng P500 milyon kaya umabot sa P600 milyon ang jackpot.
Kuwestiyunable pa rin kay Tulfo ang biglang pagtaas ng nasabing jackpot pero hindi niya tinukoy kung kailan ito nangyari.