MANILA, Philippines — Pitong Chinese fisherman na sakay ng isang bangkang pangisda ang iniligtas ng mga tauhan ng Philippine Coast Guard (PCG) makaraang masira ang hull nito nang makaengkuwentro ng masamang panahon sa parte ng karagatan sa Eastern Samar kahapon.
Ayon sa PCG Command Center na nakatanggap sila ng ulat, alas-2:09 ng hapon ukol sa fishing vessel na FV KAI DA 899 na may sakay na mga tripulanteng Tsino, na nagkaproblema sa may katubigan ng Suluan Island, Guiuan, Eastern Samar.
Agad na rumesponde sa insidente ang BRP Cabra (MRRV-4409) na nagkasa ng search and rescue operation at nang mailigtas ang mga crew na nasa maayos na pisikal na kondisyon ay hinatak ng BRP Cabra ang FV KAI DA 899 sa Tacloban Port.
Hindi pa malinaw sa PCG kung ang nasagip na Chinese ay illegal na nangingisda sa dagat na sakop ng Pilipinas.