MANILA, Philippines — Ngayong araw ay suspendido na ang klase at trabaho sa mga paaralan na sakop ng National Capital Region (NCR) bunsod ng pananalasa ng super bagyong Karding sa ilang bahagi ng bansa.
Kabilang sa mga lokal na pamahalaan na nagsuspinde na ng klase sa Metro Manila ay ang Quezon City, Caloocan City, Las Piñas City, Malabon City, Mandaluyong City, Marikina City, Manila City; Muntinlupa City; Parañaque City; Pasay City; Pasig City; San Juan City; Taguig City; Valenzuela City; Navotas City; Makati City at ang bayan ng Pateros.
Sakop ng suspensiyon ng klase ang lahat ng antas sa mga pampubliko at pribadong paaralan sa kani-kanilang nasasakupan.
Paglilinaw pa ng mga ito, suspendido ang klase maging face-to-face man ito o online class.
Maging ang pasok sa mga tanggapan ng mga naturang lokal na pamahalaan ay sinuspinde na rin nila dahil sa masamang lagay ng panahon.