MANILA, Philippines — Ginilitan sa leeg at pagsasaksakin ang isang radio commentator ng kanyang kapitbahay, kamakalawa ng gabi sa Negros Oriental.
Ang biktima na idineklarang dead on arrival sa ospital ay nakilalang si Rey Blanco, o mas kilala sa kanyang screen name na DJ Blangko, isang komentarista ng radyo station Power 102.1 DYRY RFM habang sumuko naman ang suspek na kinilalang si Charles Yanoc Amada. Ang dalawa ay kapwa residente ng Brgy. Himocdungon, Mabinay, Negros Oriental.
Sa ulat, bago naganap ang krimen, alas-6:00 ng gabi sa mismong bahay ng suspek ay nagtungo dito ang biktima para kausapin ang kapatid na si Wilbert Amada.
Subalit ang humarap sa biktima ay ang suspek na agad nagkaroon ng mainitang pagtatalo hanggang sa kumuha ng patalim ang huli at nilapitan ang una tsaka nilaslas ang leeg at pinagsasaksak pa sa katawan.
Nakahingi ng tulong ang ilang kapitbahay kaya nadatnan ang suspek na kusang-loob na sumuko.