Bodega ng asukal sa Pampanga, pinabuksan ni Marcos sa BOC
MANILA, Philippines — Dahil sa pinaghihinalaang nag-iimbak ng libu-libong sako ng asukal ay iniutos ni Pangulong Ferdinand “Bongbong” Marcos Jr. sa Bureau of Customs (BoC) na buksan ang isang bodega sa Pampanga.
Sinalakay ng mga operatiba ng Clark-based Customs Intelligence and Investigation Service at Enforcement and Security Service–Quick Reaction Team ang Lison Building na kinaroroonan ng New Public Market sa Barangay Del Pilar sa San Fernando, Pampanga, kahapon.
Kinumpirma ni Executive Secretary Victor Rodriguez na inatasan siya ng Pangulo para abisuhan ang BoC na gamitin ang visitorial powers sa lahat ng customs bonded warehouses at i-check ang imported agricultural products na nakaimbak sa mga bodega.
Kasabay nito, nagbabala ang Malacañang sa mga negosyanteng nang-iipit ng suplay ng asukal para mapataas ang presyo at mas lumaki ang kanilang kita.
Nilinaw naman ni Press Secretary Trixie Cruz-Angeles na hindi raid ang ginawa kundi pagpapatupad ng “visitorial powers” ng BoC base na rin sa utos ng Malacañang.
- Latest
