Presyo ng diesel at kerosene bababa

MANILA, Philippines — Patuloy ang pagbaba sa presyo ng produktong petrolyo sa pagdaigdigang merkado kaya inaasahan ang panibagong rollback sa presyo ng diesel at kerosene ngayong ­darating na linggo.

Posibleng bahagya namang tataas o maa­aring bumaba ang halaga ng ­gasolina sa lokal na merkado, ayon sa mga oil industry experts.

Base sa trading sa world market, inaasahan na matatapyasan ang presyo ng diesel mula P0.90 hanggang P1.20 kada litro habang ang kerosene naman ay mula P0.20 hanggang P0.50 kada litro.

Posible naman na bahagyang tumaas ng P0.10 kada litro o bumaba ng hanggang P0.20 ang kada litro ng gasolina depende sa magiging takbo ng merkado.

Ito na ang ikaanim na sunod na rollback sa mga produktong petrolyo sa bansa, habang nagpapatuloy pa rin naman ang pagtaas ng presyo ng mga pangunahing bilihin.

Sa kabila nito, hindi pa nakikitaan ng mga eksperto na magiging normal na ang presyuhan ng langis dahil sa nananatili pa rin ang tensyon sa pagitan ng Ukraine at ng Russia.