MANILA, Philippines — Isang 26-anyos na ginang ang nasawi matapos suntukin ng kanyang live-in partner sa gitna ng kanilang pagtatalo dahil sa ingay ng karaoke kahapon ng madaling araw sa pinagtatrabahuhang resort sa Sta Maria, Laguna.
Kinilala ang nasawi na si Gimm Montana, stay-in worker sa Miguel and Maria Resort, na nasa Sitio Silangan, Barangay Juan Santiago.
Batay sa ulat ng pulisya, kasama ng mag-lover sa inuman ang mga kasama sa trabaho noong Linggo ng gabi hanggang Lunes ng madaling araw.
Nauna na umanong natulog ang suspek sa kanilang quarter, subalit nang pumasok ang biktima, alas 3:00 ng madaling araw ay dala nito ang nakabukas na portable karaoke dahilan para maingayan at magising ang una.
Kinompronta ng suspek ang biktima na nauwi sa mainitang pagtatalo at sinapok ng una ang biktima sa balikat, subalit sa gilid ng leeg tumama dahilan para bumulagta at tuluyang bawian ng buhay.
Naaresto ng nagrespondeng mga pulis ang suspek na nadatnang umiiyak sa loob ng kanilang bahay hindi kalayuan sa resort.