MANILA, Philippines — Idineklarang dead-on-arrival sa ospital ang isang barangay chairman makaraang pagbabarilin ng dalawang nakamotorsiklo sa Barangay Panapaan 8, Bacoor City, Cavite, kamakalawa.
Kinilala ang biktimang si Jaime Alamo, chairman ng Brgy. Panapaan 8, Bacoor City na idineklarang dead-on-arrival sa St. Dominic Hospital dahil sa natamong tama ng mga bala sa kanyang katawan.
Patuloy naman ang ginagawang imbestigasyon ng pulisya at inaalam na ang pagkakakilanlan ng dalawang suspek na kapwa nakamotor na mabilis na nagpulasan matapos ang krimen.
Sa ulat, alas-7:40 ng gabi ay minamaneho ng biktima ang kanyang Toyota Wigo na may plakang DAC 8384 nang pagbabarilin siya ng dalawang kalalakihan na nakamotorsiklo sa kahabaan ng Niog Road, Brgy. Niog 2, Bacoor City, Cavite.
Matapos ang pamamaril ay tumakas ang mga suspek sa direksiyon ng Molino Boulevard habang ang biktima ay isinugod sa ospital subalit namatay din ito. - Cristina Timbang