MANILA, Philippines — Pinag-aaralan na ng Department of Labor and Employment (DOLE) ang pagbabakuna kontra COVID-19 sa mga opisina at iba pang lugar ng mga manggagawa.
Ito ay matapos na simulan ng gobyerno ang pagbibigay ng bakuna sa mga piling botika sa National Capital Region.
Ayon kay Labor Undersecretary Benjo Santos Benavidez, mas mapapadali ang pagbabakuna sa mga empleyado kung gagawin ito sa lugar kung saan sila nagtatrabaho.
“Higit pong gawin nating mas accessible iyong mga bakuna sa mga manggagawa. So, ang alam ko ngayon nga ay mayroong pilot implementation ang pagbabakuna ay nasa mga piling botika na. So, iyong pagbabakuna ay ituloy-tuloy na rin sa mga pagawaan,” ani Benavidez.
Kabilang ang mga manggagawa na wala pang bakuna sa unang naapektuhan ng kautusan na nagbabawal sa kanila na sumakay sa mga pampublikong transportasyon.
Una nang sinabi ni Labor Secretary Silvestre Bello III na dapat exempted ang mga manggagawa na wala pang bakuna sa no vaccine, no ride policy ng gobyerno.