Pagbawal sa paglabas ng ‘di bakunado, ipatupad ng maayos

MANILA, Philippines — Dapat na ipatupad ng maayos ang “no bakuna, no labas” policy ng gobyerno.

Ito ang paalala ni ACT-CIS Cong. Eric Yap matapos makatanggap ng ilang reklamo na kahit ang mga taong bibili ng pagkain o gamot ay hindi na rin pinapayagang lumabas.

“Yung mga walang bakuna pero kailangan bumili ng pagkain o gamot ay pwede lumabas ayon na rin sa naunang utos ng pangulo dahil kung hindi talaga sila papalabasin, saan sila kukuha ng makakain o gamot kung may sakit ang isa sa kasama nila sa bahay,” tanong ni Yap.

Ilang sumbong ang nakarating sa ACT-CIS na hinaharang umano ng mga pulis o tanod ang mga hindi bakunado para bumili ng pagkain o gamot at pinapauwi sa bahay.

“Kailangan naman ng konting konsiderasyon for humanitarian reason,” dagdag pa ni Yap. Nanawagan din ito kay DILG Sec. Eduardo Año na linawin muli ang utos ng pangulo sa mga otoridad na nagbabantay sa lansangan tulad ng mga pulis at barangay officials.