MANILA, Philippines — Sa Enero 2022 o unang quarter nito posibleng makumpleto ang pagbabakuna sa mga kabataang may edad 12-17, ayon kay Health Secretary Francisco Duque III.
Sa panayam sa kalihim, sinabi niya: “Kung 100% ng 12.7 million [minors], baka ‘yan ay umabot ng Enero, first quarter ng 2022.”
Tinatarget aniya ng gobyerno na mabakunahan laban sa COVID-19 ang 80% ng nasabing age group sa pagtatapos ng Disyembre, base sa unang pahayag ng National Task Force.
Noong Lunes ng gabi ay sinabi ni vaccine czar Carlito Galvez Jr. na gumagawa ng paraan ang pamahalaan na makumpleto na ang pagbabakuna sa mga menor-de-edad upang mabigyan sila ng proteksyon.
Ang pagbabakuna sa lahat ng menor-de-edad o 12-17 ay sisimulan sa Nobyembre 3, 2021 sa National Capital Region habang ang nationwide implementation ay sa Nob. 5.
Sa kasalukuyan, nasa 23,727 na na 12-17 minor with comorbidities ang nabakunahan na binigyang prayoridad ng pamahalaan.