MANILA, Philippines — Naitala ng OCTA Research Team ang pinakamababang reproduction number ng COVID-19 sa National Capital Region (NCR) mula noong Mayo 18.
Ito ay makaraang sumadsad sa 0.55 ang reproduction number sa pinakahuling ulat ng grupo kahapon.
Ayon kay OCTA fellow Dr. Guido David na noong Mayo 18, nakapagtala ang rehiyon ng 0.58 reproduction number saka nagtuluy-tuloy sa pagtaas.
Ang reproduction number ay ang bilang ng mga taong maaaring mahawa ng isang pasyente ng COVID-19 at kung mas mababa ito sa 1.0 ay indikasyon ito na bumabagal ang hawahan ng virus.
Ayon pa kay David, ang kasalukuyang seven-day average sa NCR ay nasa 1,411 na lamang, mula sa dating 1,448.
Kung magiging maganda ang takbo ng laban kontra COVID-19, posibleng umabot na lamang sa 400 hanggang 600 ang arawang kaso ng sakit sa Metro Manila, samantala 3,000 hanggang 4,000 naman sa buong bansa. - Angie dela Cruz