MANILA, Philippines — Nagbabala ang Muntinlupa local government unit (LGU) ng scholarship na babawian nila ang mga kabataan na mahuhuli sa paglabag sa curfew rules.
Sa layuning mapigilan ang mas malalang hawaan ng COVID-19 sa mga kabataan, mas maigting ngayon ang operasyon para madakip ang mga lalabag at posibleng masuspinde o bawian ng scholarship.
Sa ilalim ng lokal na ordinansa, ang curfew violators na menor de edad ay bibigyan muna ng mahigpit ng stern warning sa unang pagkakasala at sa ikalawang pagkakataon ay babawian na ng scholarship grant habang P300 ang multa sa non-grantee sa second offense, at P500 para sa ikatlo at susunod pang paglabag sa curfew hours na kung saan ang penalty fee ay ipasasagot sa magulang o guardian ng violator.
Nitong Setyembre 22, ang Muntinlupa Scholarship Division (MSD) ay nakapagtala ng hindi bababa sa 70 scholars na lumabag sa curfew hours, batay sa mga isinumiteng reports ng mga barangay at lokal na pulis ng Muntinlupa.
Sa 70, ay 64 ang nabigyan ng warning habang 6 ay tinanggal na sa scholarship program. Ang mga menor de edad na nakagawa ng ikalawang paglabag ay masususpinde ng isang academic year at lalagda sa undertaking para sa mahigpit na pagtupad sa curfew rules.