Karagdagang pulis ipakakalat sa palengke, ayuda centers atbp
MANILA, Philippines — Sa sandaling pairalin ang enhanced community quarantine sa rehiyon ay pinaghahanda na ng Department of Interior and Local Government (DILG) ang Philippine National Police (PNP) para sa karagdagang mga pulis na ipakakalat sa mga vaccination site sa Metro Manila.
Sinabi ni Interior Secretary Eduardo Año, maliban sa vaccination site, karagdagan din ang mga magbabantay sa mga palengke, supermarket, at ayuda centers.
Hinigpitan na rin ang border control sa NCR Plus kung saan tanging cargo vessel at authorized personnel outside of residence (APOR) lamang ang makalulusot.
Magkakaroon naman ng hiwalay na checkpoint sa mga cargo vessel at essential goods na papasok at lalabas ng NCR.
Pinaalalahanan din ng kalihim ang mga APOR na dalhin ang IATF IDs, valid IDs o dokumento mula sa pinayagang mag-operate na establisimyento.
Simula Agosto 6 hanggang 20, iiral sa pinakamahigpit na enhanced community quarantine (ECQ) ang Metro Manila upang mapigilan ang pagkalat ng mas nakahahawang Delta variant.- Mer Layson
- Latest
