Barangay sa Davao de Oro nasa state of calamity
MANILA, Philippines — Patay ang limang katao habang higit 200 pa ang naratay sa ospital dahil sa diarrhea outbreak sa bayan ng Monkayo sa Davao de Oro, ayon sa ulat kahapon.
“As of last night, may 212 cases. Five ang patay. Isa sa mga nasawi ay isang three years old,” pahayag ni Monkayo Mayor Ramil Gentugaya sa isang panayam sa radyo kahapon.
Sinabi naman ni Joseph Anthony Crizaldo, municipal information officer na kabilang sa mga nasawi ay nagkakaedad ng 41, 78, 88 , at pinakahuli ay isang 3-anyos.
Nasa kabuuan, 212 katao ang naratay at dumanas ng pagtatae sa liblib na lugar sa Brgy. Pasian ng nasabing bayan na isinailalim na sa “state of calamity”.
Sinabi ni Crizaldo na ilan sa mga kaso ay iniulat nitong Biyernes matapos na dumanas ng pagsusuka at grabeng pagdudumi ang mga biktima.
Nabatid na ang mga residente ay umiinom galing sa “water reservoir” sa kanilang lugar na siya ng mga itong pinagkukunan ng supply ng tubig kung saan ang sample na nakolekta mula dito ay nagpositibo sa coliform.